సంగీతము శాస్రీయము

నిన్న నేను రాసిన ఆర్పీ పట్నాయక్ టపాకి ఎనానిమస్ రాసిన మూడు ముక్కల ప్రశ్నాభిప్రాయానికి నా ప్రత్యాభిప్రాయమ్మిదే..

1. శాస్త్రీయ సంగీతం రాని బాలు శంకరాభరణం పాటలు ఎలా పాడగలిగాడు?

మూడు ముక్కల్లో చెప్పాలంటే, ఆయన గొప్పవాడు కాబట్టి. ఆయన సంగీత ప్రావీణ్యతని విశ్లేషించగలిగే ప్రజ్ఞ నాలో లేదు కానీ నేను చదివిన విషయాలు కొన్ని చెప్పాలి. శంకరాభరణం పాటలు పాడడానికి ముందుగా మంగళంపల్లి బాలమురళీకృష్ణని అనుకున్నారు కాని ఆయన శంకర శాస్త్రి పాటలే కాదు పాత్ర కూడా కావాలనడంతో అది కుదరలేదు. అప్పుడు పుహళేంది (కె వీ మహాదేవన్ సహాయ-సంగీత దర్శకుడు) నెల గడువులో బాలుని నూరి, శాస్త్రీయోక్తంగా పాడడం నేర్పించారు. బాలు ఎంత గొప్పగా పాడాడో వేరే చెప్పనవసరం లేదు. ఐనా ఆ పాటలని తప్పు పట్టే వారు లేకపోలేదు. అది వేరే విషయం. ఒక సందర్భంలో బాలమురళీకృష్ణ గారే, ఓంకార నాదానుసంధానమౌ పాట అక్కడక్కడ శంకరాభరణరాగంలో ఉండదని అన్నారట. Sour grapes అని తో్సిపుచ్చుకానీ, ఆయన అన్నదాంట్లో నిజం ఉండవచ్చు. కొందరు శంకరా నాద శరీరాపరా పాటలో రాగ దోషాలు ఉంటాయని అంటారు. నిజం సంగీతజ్ఞులకే ఎరుక. శంకరాభరణం పాటలు చాలా సార్లు వినడం వల్ల నేను గమనించింది మాత్రం ఇది - సరిగమలు చకచక పాడడంలో బాలు కన్నా వాణి జయరాం దిట్ట అని. ఐనా నాకు బాలు గొంతే ఎక్కువ నచ్చుతుంది. నువ్వన్నట్లుగా గొప్పగా పాడడానికి శాస్త్రీయ సంగీత సాధన అవసరం లేదు - కిషోర్ కుమార్, ముఖేష్ లాంటి వారు రఫికి ధీటుగా నిలబడడమే దానికి తార్కాణం - కానీ, శాస్త్రీయ సంగీతం పాడడానికి సాధన అవసరం. మరి అలాంటి పాటలు కూర్చడానికో? పధ్ధతి పరంగా సంగీతం నేర్వందే అధి రాదని నా అభిప్రాయం.

2. పిట్టలకు సంగీతం వచ్చా?

రాదు కాబట్టే శ్రావ్యంగా గళమెత్తగలిగిన కోయిల కూడా సరిగమలు పాడదు.

3. నాకు తెలిసి సంగీతానికి శాస్త్రీయతకు సంభంధం లేదు.

ఇంతవరకూ నే రాసిందంతా చదివితే తెలుస్తుంది, గొప్పగా పాడడానికి శాస్తీయ సంగీతం అవసరం లేదని నేనూ ఒప్పుకుంటానని, కానీ శాస్త్రీయోక్తరాగాలాపనలు కూర్చడానికి సంగీత జ్ఞానం అవసరమని..

===

On that note, I rest my case.