మనమా..

రానారె కడప కేంద్రం నుంచి వెలువరించిన మరో సమస్యకి నా పూరణలివిగో.

మొదటిది

మ. మన కో ఒద్దికనేది లేదనికదా, మర్యాదగా చాలుచా
లని దూరమ్ముగ నుండిపోతిమిటు, దూరాలింత ఏకాంత చిం
తను ప్రేమాతిశయమ్ము చేయ, వినదే నా గుండె నామాటనే,
“మనమా వొద్దిక నాదు మాట వినుమా మర్యాద కాపాడుమా”

రెండవది

మ. సినిమా పాటలదో అథోగతి సుమా, ఛీకొట్టి చెండాడనా?
“గుణమేలేని ఇలాంటి రొంపిన పడినా, గోలెందుకోయంచు యే
మనమా?” వొద్దిక నాదు మాట వినుమా మర్యాద కాపాడుమా
యననా, భాషను చంపుతున్న కవులూ, ఆగండి, యన్జెప్పనా?